Purejāta

Abyākato dhammo abyākatassa dhammassa purejātapaccayena paccayo—  ārammaṇapurejātaṃ, vatthupurejātaṃ.

Ārammaṇapurejātaṃ—  arahā cakkhuṃ aniccato dukkhato anattato vipassati. Sotaṃ…pe…  ghānaṃ…pe…  jivhaṃ…pe…  kāyaṃ…pe…  rūpe…pe…  sadde…pe…  gandhe…pe…  rase…pe…  phoṭṭhabbe…pe…  vatthuṃ aniccato dukkhato anattato vipassati, dibbena cakkhunā rūpaṃ passati, dibbāya sotadhātuyā saddaṃ suṇāti. Rūpāyatanaṃ cakkhuviññāṇassa purejātapaccayena paccayo. Saddāyatanaṃ sotaviññāṇassa…pe…  gandhāyatanaṃ ghānaviññāṇassa…pe…  rasāyatanaṃ jivhāviññāṇassa…pe…  phoṭṭhabbāyatanaṃ kāyaviññāṇassa purejātapaccayena paccayo.

Vatthupurejātaṃ—  cakkhāyatanaṃ cakkhuviññāṇassa purejātapaccayena paccayo. Sotāyatanaṃ sotaviññāṇassa…pe…  ghānāyatanaṃ ghānaviññāṇassa…pe…  jivhāyatanaṃ jivhāviññāṇassa…pe…  kāyāyatanaṃ kāyaviññāṇassa purejātapaccayena paccayo. Vatthu vipākābyākatānaṃ kiriyābyākatānaṃ khandhānaṃ purejātapaccayena paccayo.

Abyākato dhammo kusalassa dhammassa purejātapaccayena paccayo—  ārammaṇapurejātaṃ, vatthupurejātaṃ.

Ārammaṇapurejātaṃ—  sekkhā vā puthujjanā vā cakkhuṃ aniccato dukkhato anattato vipassanti. Sotaṃ…pe…  ghānaṃ…pe…  jivhaṃ…pe…  kāyaṃ…pe…  rūpe…pe…  sadde…pe…  gandhe…pe…  rase…pe…  phoṭṭhabbe…pe…  vatthuṃ aniccato dukkhato anattato vipassanti. Dibbena cakkhunā rūpaṃ passanti. Dibbāya sotadhātuyā saddaṃ suṇanti.

Vatthupurejātaṃ—  vatthu kusalānaṃ khandhānaṃ purejātapaccayena paccayo.

Abyākato dhammo akusalassa dhammassa purejātapaccayena paccayo—  ārammaṇapurejātaṃ, vatthupurejātaṃ. Ārammaṇapurejātaṃ—  cakkhuṃ assādeti abhinandati, taṃ ārabbha rāgo uppajjati, diṭṭhi uppajjati, vicikicchā uppajjati, uddhaccaṃ uppajjati, domanassaṃ uppajjati. Sotaṃ…pe…  ghānaṃ…pe…  jivhaṃ…pe…  kāyaṃ…pe…  rūpe…pe…  sadde…pe…  gandhe…pe…  rase…pe…  phoṭṭhabbe…pe…  vatthuṃ assādeti abhinandati, taṃ ārabbha rāgo uppajjati…pe…  domanassaṃ uppajjati.

Vatthupurejātaṃ—  vatthu akusalānaṃ khandhānaṃ purejātapaccayena paccayo.