Adhipati

Sekkho dhammo sekkhassa dhammassa adhipatipaccayena paccayo. Sahajātādhipati—  sekkhādhipati sampayuttakānaṃ khandhānaṃ adhipatipaccayena paccayo.

Sekkho dhammo nevasekkhanāsekkhassa dhammassa adhipatipaccayena paccayo—  ārammaṇādhipati, sahajātādhipati. Ārammaṇādhipati—  ariyā maggā vuṭṭhahitvā maggaṃ garuṃ katvā paccavekkhanti, sekkhaṃ phalaṃ garuṃ katvā paccavekkhanti. Sahajātādhipati—  sekkhādhipati cittasamuṭṭhānānaṃ rūpānaṃ adhipatipaccayena paccayo.

Sekkho dhammo sekkhassa ca nevasekkhanāsekkhassa ca dhammassa adhipatipaccayena paccayo. Sahajātādhipati—  sekkhādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.

Asekkho dhammo asekkhassa dhammassa adhipatipaccayena paccayo. Sahajātādhipati—  asekkhādhipati sampayuttakānaṃ khandhānaṃ adhipatipaccayena paccayo.

Asekkho dhammo nevasekkhanāsekkhassa dhammassa adhipatipaccayena paccayo—  ārammaṇādhipati, sahajātādhipati. Ārammaṇādhipati—  arahā asekkhaṃ phalaṃ garuṃ katvā paccavekkhati. Sahajātādhipati—  asekkhādhipati cittasamuṭṭhānānaṃ rūpānaṃ adhipatipaccayena paccayo.

Asekkho dhammo asekkhassa ca nevasekkhanāsekkhassa ca dhammassa adhipatipaccayena paccayo. Sahajātādhipati—  asekkhādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.

Nevasekkhanāsekkho dhammo nevasekkhanāsekkhassa dhammassa adhipatipaccayena paccayo—  ārammaṇādhipati, sahajātādhipati. Ārammaṇādhipati—  dānaṃ datvā sīlaṃ samādiyitvā uposathakammaṃ katvā taṃ garuṃ katvā paccavekkhati, pubbe suciṇṇāni garuṃ katvā paccavekkhati, jhānā vuṭṭhahitvā jhānaṃ garuṃ katvā paccavekkhati, ariyā nibbānaṃ garuṃ katvā paccavekkhanti, nibbānaṃ gotrabhussa, vodānassa adhipatipaccayena paccayo. Cakkhuṃ garuṃ katvā assādeti abhinandati, taṃ garuṃ katvā rāgo uppajjati, diṭṭhi uppajjati. Sotaṃ…pe…  vatthuṃ nevasekkhanāsekkhe khandhe garuṃ katvā assādeti abhinandati, taṃ garuṃ katvā rāgo uppajjati, diṭṭhi uppajjati. Sahajātādhipati—  nevasekkhanāsekkhādhipati sampayuttakānaṃ khandhānaṃ cittasamuṭṭhānānañca rūpānaṃ adhipatipaccayena paccayo.

Nevasekkhanāsekkho dhammo sekkhassa dhammassa adhipatipaccayena paccayo. Ārammaṇādhipati—  nibbānaṃ maggassa, sekkhassa phalassa adhipatipaccayena paccayo.

Nevasekkhanāsekkho dhammo asekkhassa dhammassa adhipatipaccayena paccayo. Ārammaṇādhipati—  nibbānaṃ asekkhassa phalassa adhipatipaccayena paccayo.