41.4.1 Setudānaānisaṃsa

Darito pabbatato vā,
rukkhato patitopiyaṃ;
Cutopi lacchatī ṭhānaṃ,
setudānassidaṃ phalaṃ.

Virūḷhamūlasantānaṃ,
nigrodhamiva māluto;
Amittā nappasahanti,
setudānassidaṃ phalaṃ.

Nāssa corā pasahanti,
nātimaññanti khattiyā;
Sabbe tarissatāmitte,
setudānassidaṃ phalaṃ.

Abbhokāsagataṃ santaṃ,
kaṭhinātapatāpitaṃ;
Puññakammena saṃyuttaṃ,
na bhavissati vedanā.

Devaloke manusse vā,
hatthiyānaṃ sunimmitaṃ;
Tassa saṅkappamaññāya,
nibbattissati tāvade.

Sahassassā vātajavā,
sindhavā sīghavāhanā;
Sāyaṃ pātaṃ upessanti,
setudānassidaṃ phalaṃ.

Āgantvāna manussattaṃ,
sukhitoyaṃ bhavissati;
Vehāsaṃ manujasseva,
hatthiyānaṃ bhavissati.

Kappasatasahassamhi,
okkākakulasambhavo;
Gotamo nāma gottena,
satthā loke bhavissati.

Tassa dhammesu dāyādo,
oraso dhammanimmito;
Sabbāsave pariññāya,
nibbāyissatināsavo’.

Aho me sukataṃ kammaṃ,
jalajuttamanāmake;
Tattha kāraṃ karitvāna,
pattohaṃ āsavakkhayaṃ.

Padhānaṃ pahitattomhi,
upasanto nirūpadhi;
Nāgova bandhanaṃ chetvā,
viharāmi anāsavo.

Kilesā jhāpitā mayhaṃ,
…pe…
viharāmi anāsavo.

Svāgataṃ vata me āsi,
…pe…
kataṃ buddhassa sāsanaṃ.

Paṭisambhidā catasso,
…pe…
kataṃ buddhassa sāsanaṃ”.

Itthaṃ sudaṃ āyasmā dhotako thero imā gāthāyo abhāsitthāti.

Dhotakattherassāpadānaṃ catutthaṃ.