2.4.1.22 Sanidassanattika

Katame dhammā sanidassanasappaṭighā? Rūpāyatanaṃ—  ime dhammā sanidassanasappaṭighā.

Katame dhammā anidassanasappaṭighā? Cakkhāyatanaṃ…pe…  phoṭṭhabbāyatanaṃ—  ime dhammā anidassanasappaṭighā.

Katame dhammā anidassanaappaṭighā? Catūsu bhūmīsu kusalaṃ, akusalaṃ, catūsu bhūmīsu vipāko, tīsu bhūmīsu kiriyābyākataṃ, yañca rūpaṃ anidassanaṃ appaṭighaṃ dhammāyatanapariyāpannaṃ, nibbānañca—  ime dhammā anidassanaappaṭighā.

Tikaṃ.