Pacchājāta

Micchattaniyato dhammo aniyatassa dhammassa pacchājātapaccayena paccayo—  pacchājātā micchattaniyatā khandhā purejātassa imassa kāyassa pacchājātapaccayena paccayo.

Sammattaniyato dhammo aniyatassa dhammassa pacchājātapaccayena paccayo. Pacchājātā sammattaniyatā khandhā purejātassa imassa kāyassa pacchājātapaccayena paccayo.

Aniyato dhammo aniyatassa dhammassa pacchājātapaccayena paccayo—  pacchājātā aniyatā khandhā purejātassa imassa kāyassa pacchājātapaccayena paccayo.