Purejāta

Nevācayagāmināpacayagāmī dhammo nevācayagāmināpacayagāmissa dhammassa purejātapaccayena paccayo—  ārammaṇapurejātaṃ, vatthupurejātaṃ. Ārammaṇapurejātaṃ—  arahā cakkhuṃ…pe…  vatthuṃ aniccato dukkhato anattato vipassati, dibbena cakkhunā rūpaṃ passati, dibbāya sotadhātuyā saddaṃ suṇāti, rūpāyatanaṃ cakkhuviññāṇassa…pe…  phoṭṭhabbāyatanaṃ kāyaviññāṇassa purejātapaccayena paccayo. Vatthupurejātaṃ—  cakkhāyatanaṃ cakkhuviññāṇassa…pe…  kāyāyatanaṃ kāyaviññāṇassa…pe…  vatthu nevācayagāmināpacayagāmīnaṃ khandhānaṃ purejātapaccayena paccayo.

Nevācayagāmināpacayagāmī dhammo ācayagāmissa dhammassa purejātapaccayena paccayo—  ārammaṇapurejātaṃ, vatthupurejātaṃ. Ārammaṇapurejātaṃ—  sekkhā vā puthujjanā vā cakkhuṃ…pe…  vatthuṃ aniccato dukkhato anattato vipassanti, assādenti abhinandanti; taṃ ārabbha rāgo uppajjati…pe…  domanassaṃ uppajjati, dibbena cakkhunā rūpaṃ passati, dibbāya sotadhātuyā saddaṃ suṇāti. Vatthupurejātaṃ—  vatthu ācayagāmīnaṃ khandhānaṃ purejātapaccayena paccayo.

Nevācayagāmināpacayagāmī dhammo apacayagāmissa dhammassa purejātapaccayena paccayo. Vatthupurejātaṃ—  vatthu apacayagāmīnaṃ khandhānaṃ purejātapaccayena paccayo.