Ārammaṇa

Sekkho dhammo nevasekkhanāsekkhassa dhammassa ārammaṇapaccayena paccayo—  ariyā maggā vuṭṭhahitvā maggaṃ paccavekkhanti, sekkhaṃ phalaṃ paccavekkhanti, cetopariyañāṇena sekkhacittasamaṅgissa cittaṃ jānanti, sekkhā khandhā cetopariyañāṇassa, pubbenivāsānussatiñāṇassa, anāgataṃsañāṇassa, āvajjanāya ārammaṇapaccayena paccayo.

Asekkho dhammo nevasekkhanāsekkhassa dhammassa ārammaṇapaccayena paccayo—  arahā asekkhaṃ phalaṃ paccavekkhati, cetopariyañāṇena asekkhacittasamaṅgissa cittaṃ jānāti, asekkhā khandhā cetopariyañāṇassa, pubbenivāsānussatiñāṇassa, anāgataṃsañāṇassa, āvajjanāya ārammaṇapaccayena paccayo.

Nevasekkhanāsekkho dhammo nevasekkhanāsekkhassa dhammassa ārammaṇapaccayena paccayo—  dānaṃ datvā sīlaṃ samādiyitvā uposathakammaṃ katvā taṃ paccavekkhati, pubbe suciṇṇāni…pe…  jhānā vuṭṭhahitvā jhānaṃ paccavekkhati, ariyā nibbānaṃ paccavekkhanti. Nibbānaṃ gotrabhussa, vodānassa, āvajjanāya ārammaṇapaccayena paccayo. Ariyā pahīne kilese paccavekkhanti vikkhambhite kilese paccavekkhanti, pubbe samudāciṇṇe kilese jānanti, cakkhuṃ aniccato dukkhato anattato vipassanti, assādenti abhinandanti, taṃ ārabbha rāgo uppajjati…pe…  domanassaṃ uppajjati, sotaṃ…pe…  vatthuṃ nevasekkhanāsekkhe khandhe aniccato dukkhato anattato vipassanti, assādenti…pe…  domanassaṃ uppajjati, dibbena cakkhunā rūpaṃ passati, dibbāya sotadhātuyā saddaṃ suṇāti, cetopariyañāṇena nevasekkhanāsekkhacittasamaṅgissa cittaṃ jānāti, ākāsānañcāyatanaṃ viññāṇañcāyatanassa…pe…  ākiñcaññāyatanaṃ nevasaññānāsaññāyatanassa ārammaṇapaccayena paccayo. Rūpāyatanaṃ cakkhuviññāṇassa…pe…  phoṭṭhabbāyatanaṃ kāyaviññāṇassa…pe…  nevasekkhanāsekkhā khandhā iddhividhañāṇassa, cetopariyañāṇassa, pubbenivāsānussatiñāṇassa, yathākammūpagañāṇassa, anāgataṃsañāṇassa, āvajjanāya ārammaṇapaccayena paccayo.

Nevasekkhanāsekkho dhammo sekkhassa dhammassa ārammaṇapaccayena paccayo—  nibbānaṃ maggassa, sekkhassa phalassa ārammaṇapaccayena paccayo.

Nevasekkhanāsekkho dhammo asekkhassa dhammassa ārammaṇapaccayena paccayo—  nibbānaṃ asekkhassa phalassa ārammaṇapaccayena paccayo.