Hetu

Maggārammaṇo dhammo maggārammaṇassa dhammassa hetupaccayena paccayo—  maggārammaṇā hetū sampayuttakānaṃ khandhānaṃ hetupaccayena paccayo.

Maggārammaṇo dhammo maggādhipatissa dhammassa hetupaccayena paccayo—  maggārammaṇā hetū sampayuttakānaṃ maggādhipatīnaṃ khandhānaṃ hetupaccayena paccayo.

Maggārammaṇo dhammo maggārammaṇassa ca maggādhipatissa ca dhammassa hetupaccayena paccayo. (Iminā kāraṇena sattarasa pañhā kātabbā.)