Ārammaṇa

Kāmāvacaro dhammo kāmāvacarassa dhammassa ārammaṇapaccayena paccayo—  dānaṃ datvā sīlaṃ…pe…  uposathakammaṃ…pe…  pubbe suciṇṇāni paccavekkhati assādeti abhinandati, taṃ ārabbha rāgo…pe…  domanassaṃ uppajjati; ariyā gotrabhuṃ paccavekkhanti, vodānaṃ paccavekkhanti; pahīne kilese…pe…  vikkhambhite kilese…pe…  pubbe suciṇṇāni…pe…  cakkhuṃ…pe…  vatthuṃ kāmāvacare khandhe aniccato…pe…  domanassaṃ uppajjati; rūpāyatanaṃ cakkhuviññāṇassa…pe…  phoṭṭhabbāyatanaṃ kāyaviññāṇassa ārammaṇapaccayena paccayo.

Kāmāvacaro dhammo nakāmāvacarassa dhammassa ārammaṇapaccayena paccayo—  dibbena cakkhunā rūpaṃ passati, dibbāya sotadhātuyā saddaṃ suṇāti, cetopariyañāṇena kāmāvacaracittasamaṅgissa cittaṃ jānāti, kāmāvacarā khandhā iddhividhañāṇassa, cetopariyañāṇassa, pubbenivāsānussatiñāṇassa, yathākammūpagañāṇassa, anāgataṃsañāṇassa ārammaṇapaccayena paccayo.

Nakāmāvacaro dhammo nakāmāvacarassa dhammassa ārammaṇapaccayena paccayo—  nibbānaṃ maggassa, phalassa ārammaṇapaccayena paccayo; cetopariyañāṇena nakāmāvacaracittasamaṅgissa cittaṃ jānāti, ākāsānañcāyatanaṃ viññāṇañcāyatanassa…pe…  ākiñcaññāyatanaṃ nevasaññānāsaññāyatanassa…pe…  nakāmāvacarā khandhā iddhividhañāṇassa, cetopariyañāṇassa, pubbenivāsānussatiñāṇassa, yathākammūpagañāṇassa, anāgataṃsañāṇassa ārammaṇapaccayena paccayo.

Nakāmāvacaro dhammo kāmāvacarassa dhammassa ārammaṇapaccayena paccayo—  jhānā vuṭṭhahitvā jhānaṃ paccavekkhati assādeti abhinandati, taṃ ārabbha rāgo uppajjati, diṭṭhi uppajjati…pe…  ariyā maggā vuṭṭhahitvā maggaṃ paccavekkhanti; phalaṃ…pe…  nibbānaṃ paccavekkhanti, nibbānaṃ gotrabhussa, vodānassa, āvajjanāya ārammaṇapaccayena paccayo; ākāsānañcāyatanaṃ paccavekkhati, viññāṇañcāyatanaṃ paccavekkhati, ākiñcaññāyatanaṃ paccavekkhati, nevasaññānāsaññāyatanaṃ paccavekkhati, dibbaṃ cakkhuṃ paccavekkhati, dibbaṃ sotadhātuṃ paccavekkhati, iddhividhañāṇaṃ paccavekkhati, cetopariyañāṇaṃ…pe…  pubbenivāsānussatiñāṇaṃ…pe…  yathākammūpagañāṇaṃ…pe…  anāgataṃsañāṇaṃ paccavekkhati, nakāmāvacare khandhe aniccato…pe…  domanassaṃ uppajjati.