1.3.3.2 Dutiyacchakka

Nimittaṃ āvajjato assāse cittaṃ vikampati—  samādhissa paripantho. Assāsaṃ āvajjato nimitte cittaṃ vikampati—  samādhissa paripantho. Nimittaṃ āvajjato passāse cittaṃ vikampati—  samādhissa paripantho. Passāsaṃ āvajjato nimitte cittaṃ vikampati—  samādhissa paripantho. Assāsaṃ āvajjato passāse cittaṃ vikampati—  samādhissa paripantho. Passāsaṃ āvajjato assāse cittaṃ vikampati—  samādhissa paripantho.

Nimittaṃ āvajjamānassa,
assāse vikkhipate mano;
Assāsaṃ āvajjamānassa,
nimitte cittaṃ vikampati.

Nimittaṃ āvajjamānassa,
passāse vikkhipate mano;
Passāsaṃ āvajjamānassa,
nimitte cittaṃ vikampati.

Assāsaṃ āvajjamānassa,
passāse vikkhipate mano;
Passāsaṃ āvajjamānassa,
assāse cittaṃ vikampati.

Cha ete upakkilesā,
Ānāpānassatisamādhissa;
Yehi vikkhippamānassa,
No ca cittaṃ vimuccati;
Vimokkhaṃ appajānantā,
Te honti parapattiyāti.