2.20 Pārisuddhidānakathā

Atha kho bhagavā bhikkhū āmantesi—

“sannipatatha, bhikkhave, saṃgho uposathaṃ karissatī”ti. Evaṃ vutte, aññataro bhikkhu bhagavantaṃ etadavoca—

“atthi, bhante, bhikkhu gilāno, so anāgato”ti.

“Anujānāmi, bhikkhave, gilānena bhikkhunā pārisuddhiṃ dātuṃ. Evañca pana, bhikkhave, dātabbā—  tena gilānena bhikkhunā ekaṃ bhikkhuṃ upasaṅkamitvā ekaṃsaṃ uttarāsaṅgaṃ karitvā ukkuṭikaṃ nisīditvā añjaliṃ paggahetvā evamassa vacanīyo—  ‘pārisuddhiṃ dammi, pārisuddhiṃ me hara, pārisuddhiṃ me ārocehī’ti. Kāyena viññāpeti, vācāya viññāpeti, kāyena vācāya viññāpeti, dinnā hoti pārisuddhi. Na kāyena viññāpeti, na vācāya viññāpeti, na kāyena vācāya viññāpeti, na dinnā hoti pārisuddhi. Evañcetaṃ labhetha, iccetaṃ kusalaṃ. No ce labhetha, so, bhikkhave, gilāno bhikkhu mañcena vā pīṭhena vā saṃghamajjhe ānetvā uposatho kātabbo. Sace, bhikkhave, gilānupaṭṭhākānaṃ bhikkhūnaṃ evaṃ hoti—  ‘sace kho mayaṃ gilānaṃ ṭhānā cāvessāma, ābādho vā abhivaḍḍhissati kālaṃkiriyā vā bhavissatī’ti, na, bhikkhave, gilāno bhikkhu ṭhānā cāvetabbo. Saṃghena tattha gantvā uposatho kātabbo. Na tveva vaggena saṃghena uposatho kātabbo. Kareyya ce, āpatti dukkaṭassa.

Pārisuddhihārako ce, bhikkhave, dinnāya pārisuddhiyā tattheva pakkamati, aññassa dātabbā pārisuddhi. Pārisuddhihārako ce, bhikkhave, dinnāya pārisuddhiyā tattheva vibbhamati…pe…  kālaṃ karoti…  sāmaṇero paṭijānāti…  sikkhaṃ paccakkhātako paṭijānāti…  antimavatthuṃ ajjhāpannako paṭijānāti…  ummattako paṭijānāti…  khittacitto paṭijānāti…  vedanāṭṭo paṭijānāti…  āpattiyā adassane ukkhittako paṭijānāti…  āpattiyā appaṭikamme ukkhittako paṭijānāti…  pāpikāya diṭṭhiyā appaṭinissagge ukkhittako paṭijānāti…  paṇḍako paṭijānāti…  theyyasaṃvāsako paṭijānāti…  titthiyapakkantako paṭijānāti…  tiracchānagato paṭijānāti…  mātughātako paṭijānāti…  pitughātako paṭijānāti…  arahantaghātako paṭijānāti…  bhikkhunidūsako paṭijānāti…  saṃghabhedako paṭijānāti…  lohituppādako paṭijānāti…  ubhatobyañjanako paṭijānāti, aññassa dātabbā pārisuddhi.

Pārisuddhihārako ce, bhikkhave, dinnāya pārisuddhiyā antarāmagge pakkamati, anāhaṭā hoti pārisuddhi. Pārisuddhihārako ce, bhikkhave, dinnāya pārisuddhiyā antarāmagge vibbhamati…pe…  ubhatobyañjanako paṭijānāti, anāhaṭā hoti pārisuddhi.

Pārisuddhihārako ce, bhikkhave, dinnāya pārisuddhiyā saṃghappatto pakkamati, āhaṭā hoti pārisuddhi. Pārisuddhihārako ce, bhikkhave, dinnāya pārisuddhiyā saṃghappatto vibbhamati…pe…  ubhatobyañjanako paṭijānāti, āhaṭā hoti pārisuddhi.

Pārisuddhihārako ce, bhikkhave, dinnāya pārisuddhiyā saṃghappatto sutto na āroceti, pamatto na āroceti, samāpanno na āroceti, āhaṭā hoti pārisuddhi. Pārisuddhihārakassa anāpatti.

Pārisuddhihārako ce, bhikkhave, dinnāya pārisuddhiyā saṃghappatto sañcicca na āroceti, āhaṭā hoti pārisuddhi. Pārisuddhihārakassa āpatti dukkaṭassā”ti.