4.2.9 Navattabbaṃsaṃghassadinnaṃmahapphalantikathā

๐ Na vattabbaṃ—

“saṃghassa dinnaṃ mahapphalan”ti? Āmantā. Nanu saṃgho āhuneyyo pāhuneyyo dakkhiṇeyyo añjalikaraṇīyo anuttaraṃ puññakkhettaṃ lokassāti? Āmantā. Hañci saṃgho āhuneyyo…pe…  anuttaraṃ puññakkhettaṃ lokassa, tena vata re vattabbe—

“saṃghassa dinnaṃ mahapphalan”ti.

๐ Na vattabbaṃ—

“saṃghassa dinnaṃ mahapphalan”ti? Āmantā. Nanu cattāro purisayugā aṭṭha purisapuggalā dakkhiṇeyyā vuttā bhagavatāti? Āmantā. Hañci cattāro purisayugā aṭṭha purisapuggalā dakkhiṇeyyā vuttā bhagavatā, tena vata re vattabbe—

“saṃghassa dinnaṃ mahapphalan”ti.

๐ Na vattabbaṃ—

“saṃghassa dinnaṃ mahapphalan”ti? Āmantā. Nanu vuttaṃ bhagavatā—

“saṃghe, gotami, dehi, saṃghe te dinne ahañceva pūjito bhavissāmi saṃgho cā”ti. Attheva suttantoti? Āmantā. Tena hi saṃghassa dinnaṃ mahapphalanti.

๐ Na vattabbaṃ—

“saṃghassa dinnaṃ mahapphalan”ti? Āmantā. Nanu sakko devānamindo bhagavantaṃ etadavoca—

“Yajamānānaṃ manussānaṃ,
puññapekkhāna pāṇinaṃ;
Karotaṃ opadhikaṃ puññaṃ,
kattha dinnaṃ mahapphalan”ti.

“Cattāro ca paṭipannā,
cattāro ca phale ṭhitā;
Esa saṃgho ujubhūto,
paññāsīlasamāhito.

Yajamānānaṃ manussānaṃ,
puññapekkhāna pāṇinaṃ;
Karotaṃ opadhikaṃ puññaṃ,
saṃghe dinnaṃ mahapphalanti.

Eso hi saṃgho vipulo mahaggato,
Esappameyyo udadhīva sāgaro;
Ete hi seṭṭhā naravīrasāvakā,
Pabhaṅkarā dhammamudīrayanti.

Tesaṃ sudinnaṃ suhutaṃ suyiṭṭhaṃ,
Ye saṃghamuddissa dadanti dānaṃ;
Sā dakkhiṇā saṃghagatā patiṭṭhitā,
Mahapphalā lokavidūna vaṇṇitā.

Etādisaṃ yaññamanussarantā,
Ye vedajātā vicaranti loke;
Vineyya maccheramalaṃ samūlaṃ,
Aninditā saggamupenti ṭhānan”ti.

Attheva suttantoti? Āmantā. Tena hi saṃghassa dinnaṃ mahapphalanti.

Na vattabbaṃ saṃghassa dinnaṃ mahapphalantikathā niṭṭhitā.