3.2 Iddhikathā

Kā iddhi? Kati iddhiyo? Iddhiyā kati bhūmiyo, kati pādā, kati padāni, kati mūlāni? Kā iddhīti? Ijjhanaṭṭhena iddhi. Kati iddhiyoti? Dasa iddhiyo. Iddhiyā kati bhūmiyoti? Iddhiyā catasso bhūmiyo, cattāro pādā, aṭṭha padāni, soḷasa mūlāni.

Katamā dasa iddhiyo? Adhiṭṭhānā iddhi, vikubbanā iddhi, manomayā iddhi, ñāṇavipphārā iddhi, samādhivipphārā iddhi, ariyā iddhi, kammavipākajā iddhi, puññavato iddhi, vijjāmayā iddhi, tattha tattha sammāpayogapaccayā ijjhanaṭṭhena iddhi.

Iddhiyā katamā catasso bhūmiyo? Vivekajābhūmi paṭhamaṃ jhānaṃ, pītisukhabhūmi dutiyaṃ jhānaṃ, upekkhāsukhabhūmi tatiyaṃ jhānaṃ, adukkhamasukhābhūmi catutthaṃ jhānaṃ. Iddhiyā imā catasso bhūmiyo iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.

Iddhiyā katame cattāro pādā? Idha bhikkhu chandasamādhipadhānasaṅkhārasamannāgataṃ iddhipādaṃ bhāveti, cittasamādhipadhānasaṅkhārasamannāgataṃ iddhipādaṃ bhāveti, vīriyasamādhipadhānasaṅkhārasamannāgataṃ iddhipādaṃ bhāveti, vīmaṃsāsamādhipadhānasaṅkhārasamannāgataṃ iddhipādaṃ bhāveti. Iddhiyā ime cattāro pādā iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.

Iddhiyā katamāni aṭṭha padāni? Chandañce bhikkhu nissāya labhati samādhiṃ, labhati cittassa ekaggataṃ. Chando na samādhi, samādhi na chando. Añño chando, añño samādhi. Vīriyañce bhikkhu nissāya labhati samādhiṃ, labhati cittassa ekaggataṃ. Vīriyaṃ na samādhi, samādhi na vīriyaṃ. Aññaṃ vīriyaṃ, añño samādhi. Cittañce bhikkhu nissāya labhati samādhiṃ, labhati cittassa ekaggataṃ. Cittaṃ na samādhi, samādhi na cittaṃ. Aññaṃ cittaṃ, añño samādhi. Vīmaṃsañce bhikkhu nissāya labhati samādhiṃ, labhati cittassa ekaggataṃ. Vīmaṃsā na samādhi, samādhi na vīmaṃsā. Aññā vīmaṃsā, añño samādhi. Iddhiyā imāni aṭṭha padāni iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.

Iddhiyā katamāni soḷasa mūlāni? Anonataṃ cittaṃ kosajje na iñjatīti—  āneñjaṃ. Anunnataṃ cittaṃ uddhacce na iñjatīti—  āneñjaṃ. Anabhinataṃ cittaṃ rāge na iñjatīti—  āneñjaṃ. Anapanataṃ cittaṃ byāpāde na iñjatīti—  āneñjaṃ. Anissitaṃ cittaṃ diṭṭhiyā na iñjatīti—  āneñjaṃ. Appaṭibaddhaṃ cittaṃ chandarāge na iñjatīti—  āneñjaṃ. Vippamuttaṃ cittaṃ kāmarāge na iñjatīti—  āneñjaṃ. Visaññuttaṃ cittaṃ kilese na iñjatīti—  āneñjaṃ. Vimariyādikataṃ cittaṃ kilesamariyāde na iñjatīti—  āneñjaṃ. Ekattagataṃ cittaṃ nānattakilesehi na iñjatīti—  āneñjaṃ. Saddhāya pariggahitaṃ cittaṃ assaddhiye na iñjatīti—  āneñjaṃ. Vīriyena pariggahitaṃ cittaṃ kosajje na iñjatīti—  āneñjaṃ. Satiyā pariggahitaṃ cittaṃ pamāde na iñjatīti—  āneñjaṃ. Samādhinā pariggahitaṃ cittaṃ uddhacce na iñjatīti—  āneñjaṃ. Paññāya pariggahitaṃ cittaṃ avijjāya na iñjatīti—  āneñjaṃ. Obhāsagataṃ cittaṃ avijjandhakāre na iñjatīti—  āneñjaṃ. Iddhiyā imāni soḷasa mūlāni iddhilābhāya iddhipaṭilābhāya iddhivikubbanatāya iddhivisavitāya iddhivasībhāvāya iddhivesārajjāya saṃvattantīti.