14.2.1--11

“Etadaggaṃ, bhikkhave, mama sāvakānaṃ bhikkhūnaṃ manomayaṃ kāyaṃ abhinimminantānaṃ yadidaṃ cūḷapanthako.

…  Cetovivaṭṭakusalānaṃ yadidaṃ cūḷapanthako.

…  Saññāvivaṭṭakusalānaṃ yadidaṃ mahāpanthako.

…  Araṇavihārīnaṃ yadidaṃ subhūti.

…  Dakkhiṇeyyānaṃ yadidaṃ subhūti.

…  Āraññakānaṃ yadidaṃ revato khadiravaniyo.

…  Jhāyīnaṃ yadidaṃ kaṅkhārevato.

…  Āraddhavīriyānaṃ yadidaṃ soṇo koḷiviso.

…  Kalyāṇavākkaraṇānaṃ yadidaṃ soṇo kuṭikaṇṇo.

…  Lābhīnaṃ yadidaṃ sīvali.

…  Saddhādhimuttānaṃ yadidaṃ vakkalī”ti.

Vaggo dutiyo.