39.10.3

Brāhmaṇo sutavā āsiṃ,
ahaṃ sakkatapūjito;
Mahāvane pañcasate,
mante vācemi māṇave.

Tatthāgato isi bhīmo,
pañcābhiñño mahiddhiko;
Tañcāhaṃ āgataṃ disvā,
abbhācikkhiṃ adūsakaṃ.

Tatohaṃ avacaṃ sisse,
kāmabhogī ayaṃ isi;
Mayhampi bhāsamānassa,
anumodiṃsu māṇavā.

Tato māṇavakā sabbe,
bhikkhamānaṃ kule kule;
Mahājanassa āhaṃsu,
kāmabhogī ayaṃ isi.

Tena kammavipākena,
pañca bhikkhusatā ime;
Abbhakkhānaṃ labhuṃ sabbe,
sundarikāya kāraṇā.