2.3.1.11 Sekkhattika

Katame dhammā sekkhā? Cattāro maggā apariyāpannā, heṭṭhimāni ca tīṇi sāmaññaphalāni—  ime dhammā sekkhā.

Katame dhammā asekkhā? Upariṭṭhimaṃ arahattaphalaṃ—  ime dhammā asekkhā.

Katame dhammā nevasekkhanāsekkhā? Te dhamme ṭhapetvā, avasesā kusalākusalābyākatā dhammā kāmāvacarā, rūpāvacarā, arūpāvacarā; vedanākkhandho…pe…  viññāṇakkhandho; sabbañca rūpaṃ, asaṅkhatā ca dhātu—  ime dhammā nevasekkhanāsekkhā.