4.1.4 Nandakattheragāthā

“Dhiratthu pūre duggandhe,
mārapakkhe avassute;
Navasotāni te kāye,
yāni sandanti sabbadā.

Mā purāṇaṃ amaññittho,
māsādesi tathāgate;
Saggepi te na rajjanti,
kimaṅgaṃ pana mānuse.

Ye ca kho bālā dummedhā,
dummantī mohapārutā;
Tādisā tattha rajjanti,
mārakhittamhi bandhane.

Yesaṃ rāgo ca doso ca,
avijjā ca virājitā;
Tādī tattha na rajjanti,
chinnasuttā abandhanā”ti.

…  Nandako thero… .