Ārammaṇa

Dassanena pahātabbahetukaṃ dhammaṃ paṭicca dassanena pahātabbahetuko dhammo uppajjati ārammaṇapaccayā—  dassanena pahātabbahetukaṃ ekaṃ khandhaṃ paṭicca tayo khandhā…pe…  dve khandhe paṭicca dve khandhā.

Dassanena pahātabbahetukaṃ dhammaṃ paṭicca nevadassanena nabhāvanāya pahātabbahetuko dhammo uppajjati ārammaṇapaccayā—  vicikicchāsahagate khandhe paṭicca vicikicchāsahagato moho.

Dassanena pahātabbahetukaṃ dhammaṃ paṭicca dassanena pahātabbahetuko ca nevadassanena nabhāvanāya pahātabbahetuko ca dhammā uppajjanti ārammaṇapaccayā—  vicikicchāsahagataṃ ekaṃ khandhaṃ paṭicca tayo khandhā ca moho ca…pe…  dve khandhe paṭicca dve khandhā ca moho ca.

Bhāvanāya pahātabbahetukaṃ dhammaṃ paṭicca bhāvanāya pahātabbahetuko dhammo uppajjati ārammaṇapaccayā…  tīṇi. (Dassanena sadisaṃ vibhajitabbaṃ.)

Nevadassanena nabhāvanāya pahātabbahetukaṃ dhammaṃ paṭicca nevadassanena nabhāvanāya pahātabbahetuko dhammo uppajjati ārammaṇapaccayā—  nevadassanena nabhāvanāya pahātabbahetukaṃ ekaṃ khandhaṃ paṭicca tayo khandhā…pe…  dve khandhe paṭicca dve khandhā. Paṭisandhikkhaṇe…pe…  vatthuṃ paṭicca khandhā.

Nevadassanena nabhāvanāya pahātabbahetukaṃ dhammaṃ paṭicca dassanena pahātabbahetuko dhammo uppajjati ārammaṇapaccayā—  vicikicchāsahagataṃ mohaṃ paṭicca sampayuttakā khandhā.

Nevadassanena nabhāvanāya pahātabbahetukaṃ dhammaṃ paṭicca bhāvanāya pahātabbahetuko dhammo uppajjati ārammaṇapaccayā—  uddhaccasahagataṃ mohaṃ paṭicca sampayuttakā khandhā.

Dassanena pahātabbahetukañca nevadassanena nabhāvanāya pahātabbahetukañca dhammaṃ paṭicca dassanena pahātabbahetuko dhammo uppajjati ārammaṇapaccayā—  vicikicchāsahagataṃ ekaṃ khandhañca mohañca paṭicca tayo khandhā…pe…  dve khandhe ca mohañca paṭicca dve khandhā.

Bhāvanāya pahātabbahetukañca nevadassanena nabhāvanāya pahātabbahetukañca dhammaṃ paṭicca bhāvanāya pahātabbahetuko dhammo uppajjati ārammaṇapaccayā—  uddhaccasahagataṃ ekaṃ khandhañca mohañca paṭicca tayo khandhā…pe…  dve khandhe ca mohañca paṭicca dve khandhā.