2.1.7 Ātāpīsutta

Vuttañhetaṃ bhagavatā vuttamarahatāti me sutaṃ—

“Anātāpī, bhikkhave, bhikkhu anottāpī abhabbo sambodhāya, abhabbo nibbānāya, abhabbo anuttarassa yogakkhemassa adhigamāya. Ātāpī ca kho, bhikkhave, bhikkhu ottāpī bhabbo sambodhāya, bhabbo nibbānāya, bhabbo anuttarassa yogakkhemassa adhigamāyā”ti. Etamatthaṃ bhagavā avoca. Tatthetaṃ iti vuccati—

“Anātāpī anottāpī,
kusīto hīnavīriyo;
Yo thinamiddhabahulo,
ahirīko anādaro;
Abhabbo tādiso bhikkhu,
phuṭṭhuṃ sambodhimuttamaṃ.

Yo ca satimā nipako jhāyī,
Ātāpī ottāpī ca appamatto;
Saṃyojanaṃ jātijarāya chetvā,
Idheva sambodhimanuttaraṃ phuse”ti.

Ayampi attho vutto bhagavatā, iti me sutanti.

Sattamaṃ.