9.5 Pārivāsikādikathā

Pārivāsikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya—  akammaṃ na ca karaṇīyaṃ. Mūlāyapaṭikassanārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya—  akammaṃ na ca karaṇīyaṃ. Mānattārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya—  akammaṃ na ca karaṇīyaṃ. Mānattacārikacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya—  akammaṃ na ca karaṇīyaṃ. Abbhānārahacatuttho ce, bhikkhave, parivāsaṃ dadeyya, mūlāya paṭikasseyya, mānattaṃ dadeyya, taṃvīso abbheyya—  akammaṃ na ca karaṇīyaṃ.

Ekaccassa, bhikkhave, saṃghamajjhe paṭikkosanā ruhati, ekaccassa na ruhati. Kassa ca, bhikkhave, saṃghamajjhe paṭikkosanā na ruhati? Bhikkhuniyā, bhikkhave, saṃghamajjhe paṭikkosanā na ruhati. Sikkhamānāya, bhikkhave…pe…  sāmaṇerassa, bhikkhave…  sāmaṇeriyā, bhikkhave…  sikkhāpaccakkhātakassa, bhikkhave…  antimavatthuṃ ajjhāpannakassa, bhikkhave…  ummattakassa, bhikkhave…  khittacittassa, bhikkhave…  vedanāṭṭassa, bhikkhave…  āpattiyā adassane ukkhittakassa, bhikkhave…  āpattiyā appaṭikamme ukkhittakassa, bhikkhave…  pāpikāya diṭṭhiyā appaṭinissagge ukkhittakassa, bhikkhave…  paṇḍakassa, bhikkhave…  theyyasaṃvāsakassa, bhikkhave…  titthiyapakkantakassa, bhikkhave…  tiracchānagatassa, bhikkhave…  mātughātakassa, bhikkhave…  pitughātakassa, bhikkhave…  arahantaghātakassa, bhikkhave…  bhikkhunidūsakassa, bhikkhave…  saṃghabhedakassa, bhikkhave…  lohituppādakassa, bhikkhave…  ubhatobyañjanakassa, bhikkhave…  nānāsaṃvāsakassa, bhikkhave…  nānāsīmāya ṭhitassa, bhikkhave…  iddhiyā vehāse ṭhitassa, bhikkhave, yassa saṃgho kammaṃ karoti, tassa ca, bhikkhave, saṃghamajjhe paṭikkosanā na ruhati. Imesaṃ kho, bhikkhave, saṃghamajjhe paṭikkosanā na ruhati.

Kassa ca, bhikkhave, saṃghamajjhe paṭikkosanā ruhati? Bhikkhussa, bhikkhave, pakatattassa samānasaṃvāsakassa samānasīmāya ṭhitassa antamaso ānantarikassāpi bhikkhuno viññāpentassa saṃghamajjhe paṭikkosanā ruhati. Imassa, bhikkhave, saṃghamajjhe paṭikkosanā ruhati.