Hetu-ārammaṇa

Akusalaṃ saṃkiliṭṭhaṃ dhammaṃ paṭicca akusalo saṃkiliṭṭho dhammo uppajjati hetupaccayā. (Saṃkhittaṃ.)

Hetuyā ekaṃ, ārammaṇe ekaṃ…pe…  avigate ekaṃ. (Saṃkhittaṃ.)

(Sahajātavārepi…pe…  pañhāvārepi sabbattha ekaṃ.)

Kusalaṃ asaṃkiliṭṭhaṃ dhammaṃ paṭicca kusalo asaṃkiliṭṭho dhammo uppajjati hetupaccayā. Kusalaṃ asaṃkiliṭṭhaṃ dhammaṃ paṭicca abyākato asaṃkiliṭṭho dhammo uppajjati hetupaccayā. Kusalaṃ asaṃkiliṭṭhaṃ dhammaṃ paṭicca kusalo asaṃkiliṭṭho ca abyākato asaṃkiliṭṭho ca dhammā uppajjanti hetupaccayā.

Abyākataṃ asaṃkiliṭṭhaṃ dhammaṃ paṭicca abyākato asaṃkiliṭṭho dhammo uppajjati hetupaccayā. Kusalaṃ asaṃkiliṭṭhañca abyākataṃ asaṃkiliṭṭhañca dhammaṃ paṭicca abyākato asaṃkiliṭṭho dhammo uppajjati hetupaccayā.

Kusalaṃ asaṃkiliṭṭhaṃ dhammaṃ paṭicca kusalo asaṃkiliṭṭho dhammo uppajjati ārammaṇapaccayā.

Abyākataṃ asaṃkiliṭṭhaṃ dhammaṃ paṭicca abyākato asaṃkiliṭṭho dhammo uppajjati ārammaṇapaccayā. (Saṃkhittaṃ.)

Hetuyā pañca, ārammaṇe dve, adhipatiyā pañca…pe…  vipāke ekaṃ…pe…  avigate pañca. (Saṃkhittaṃ.)

(Sahajātavārampi…pe…  sampayuttavārampi paṭiccavārasadisaṃ.)

Kusalo asaṃkiliṭṭho dhammo kusalassa asaṃkiliṭṭhassa dhammassa hetupaccayena paccayo…  tīṇi.

Abyākato asaṃkiliṭṭho dhammo abyākatassa asaṃkiliṭṭhassa dhammassa hetupaccayena paccayo.

Kusalo asaṃkiliṭṭho dhammo kusalassa asaṃkiliṭṭhassa dhammassa ārammaṇapaccayena paccayo…  dve.

Abyākato asaṃkiliṭṭho dhammo abyākatassa asaṃkiliṭṭhassa dhammassa ārammaṇapaccayena paccayo…  dve. (Saṃkhittaṃ.)

Hetuyā cattāri, ārammaṇe cattāri, adhipatiyā pañca, anantare cattāri…pe…  sahajāte pañca, aññamaññe dve, nissaye satta, upanissaye cattāri, purejāte pacchājāte āsevane dve, kamme cattāri, vipāke ekaṃ, āhāre…pe…  magge cattāri, sampayutte dve, vippayutte tīṇi…pe…  avigate satta. (Saṃkhittaṃ.)

(Yathā kusalattike pañhāvāraṃ, evaṃ vitthāretabbaṃ.)