9.26 Paṭisāraṇīyakammavivādakathā

Idha pana, bhikkhave, bhikkhu gihī akkosati paribhāsati. Tatra ce bhikkhūnaṃ evaṃ hoti—  ‘ayaṃ kho, āvuso, bhikkhu gihī akkosati paribhāsati. Handassa mayaṃ paṭisāraṇīyakammaṃ karomā’ti. Te tassa paṭisāraṇīyakammaṃ karonti—  adhammena vaggā…pe…  adhammena samaggā…  dhammena vaggā…  dhammapatirūpakena vaggā…  dhammapatirūpakena samaggā. Tatraṭṭho saṃgho vivadati—  ‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamman’ti. Tatra, bhikkhave, ye te bhikkhū evamāhaṃsu—  ‘dhammapatirūpakena samaggakamman’ti, ye ca te bhikkhū evamāhaṃsu—  ‘akataṃ kammaṃ dukkaṭaṃ kammaṃ puna kātabbaṃ kamman’ti, ime tattha bhikkhū dhammavādino. Ime pañca vārā saṃkhittā.