Ārammaṇa

Āsavasampayutto dhammo āsavasampayuttassa dhammassa ārammaṇapaccayena paccayo—  āsavasampayutte khandhe ārabbha āsavasampayuttakā khandhā uppajjanti.

Āsavasampayutto dhammo āsavavippayuttassa dhammassa ārammaṇapaccayena paccayo—  āsavasampayutte khandhe ārabbha āsavavippayuttā khandhā ca moho ca uppajjanti.

Āsavasampayutto dhammo āsavasampayuttassa ca āsavavippayuttassa ca dhammassa ārammaṇapaccayena paccayo—  āsavasampayutte khandhe ārabbha domanassasahagatā vicikicchāsahagatā uddhaccasahagatā khandhā ca moho ca uppajjanti.

Āsavavippayutto dhammo āsavavippayuttassa dhammassa ārammaṇapaccayena paccayo—  dānaṃ datvā sīlaṃ…pe…  uposathakammaṃ katvā taṃ paccavekkhati; pubbe suciṇṇāni…pe…  jhānā…pe…  ariyā maggaṃ…pe…  phalaṃ…pe…  nibbānaṃ…pe…  nibbānaṃ gotrabhussa, vodānassa, maggassa, phalassa, āvajjanāya ārammaṇapaccayena paccayo; ariyā āsavavippayutte pahīne kilese paccavekkhanti; vikkhambhite…pe…  pubbe…pe…  cakkhuṃ…pe…  vatthuṃ āsavavippayutte khandhe aniccato dukkhato anattato vipassati. (Idha assādanā natthi) Dibbena cakkhunā rūpaṃ passati, dibbāya sotadhātuyā saddaṃ suṇāti. Cetopariyañāṇena āsavavippayuttacittasamaṅgissa cittaṃ jānāti, ākāsānañcāyatanaṃ viññāṇañcāyatanassa…pe…  ākiñcaññāyatanaṃ nevasaññānāsaññāyatanassa…pe…  rūpāyatanaṃ cakkhuviññāṇassa…pe…  phoṭṭhabbāyatanaṃ kāyaviññāṇassa…pe…  āsavavippayuttā khandhā iddhividhañāṇassa, cetopariyañāṇassa, pubbenivāsānussatiñāṇassa, yathākammūpagañāṇassa, anāgataṃsañāṇassa, āvajjanāya mohassa ārammaṇapaccayena paccayo.

Āsavavippayutto dhammo āsavasampayuttassa dhammassa ārammaṇapaccayena paccayo—  dānaṃ datvā sīlaṃ…pe…  uposathakammaṃ katvā taṃ assādeti abhinandati, taṃ ārabbha rāgo uppajjati, diṭṭhi…pe…  vicikicchā…pe…  uddhaccaṃ…pe…  domanassaṃ uppajjati; pubbe suciṇṇāni…pe…  jhānā vuṭṭhahitvā jhānaṃ…pe…  cakkhuṃ…pe…  vatthuṃ āsavavippayutte khandhe assādeti abhinandati, taṃ ārabbha rāgo…pe…  diṭṭhi…  domanassaṃ…  vicikicchā…  uddhaccaṃ uppajjati.

Āsavavippayutto dhammo āsavasampayuttassa ca āsavavippayuttassa ca dhammassa ārammaṇapaccayena paccayo—  cakkhuṃ…pe…  vatthuṃ āsavavippayutte khandhe ārabbha domanassasahagatā vicikicchāsahagatā uddhaccasahagatā khandhā ca moho ca uppajjanti.

Āsavasampayutto ca āsavavippayutto ca dhammā āsavasampayuttassa dhammassa ārammaṇapaccayena paccayo—  domanassasahagate vicikicchāsahagate uddhaccasahagate khandhe ca mohañca ārabbha āsavasampayuttā khandhā uppajjanti.

Āsavasampayutto ca āsavavippayutto ca dhammā āsavavippayuttassa dhammassa ārammaṇapaccayena paccayo—  domanassasahagate vicikicchāsahagate uddhaccasahagate khandhe ca mohañca ārabbha āsavavippayuttā khandhā ca moho ca uppajjanti.

Āsavasampayutto ca āsavavippayutto ca dhammā āsavasampayuttassa ca āsavavippayuttassa ca dhammassa ārammaṇapaccayena paccayo—  domanassasahagate vicikicchāsahagate uddhaccasahagate khandhe ca mohañca ārabbha domanassasahagatā vicikicchāsahagatā uddhaccasahagatā khandhā ca moho ca uppajjanti.