9.7 Adhammakammādikathā

Idha pana, bhikkhave, bhikkhussa na hoti āpatti daṭṭhabbā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattin’ti? So evaṃ vadeti—  ‘natthi me, āvuso, āpatti, yamahaṃ passeyyan’ti. Taṃ saṃgho āpattiyā adassane ukkhipati—  adhammakammaṃ.

Idha pana, bhikkhave, bhikkhussa na hoti āpatti paṭikātabbā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, paṭikarohi taṃ āpattin’ti. So evaṃ vadeti—  ‘natthi me, āvuso, āpatti, yamahaṃ paṭikareyyan’ti. Taṃ saṃgho āpattiyā appaṭikamme ukkhipati—  adhammakammaṃ.

Idha pana, bhikkhave, bhikkhussa na hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘pāpikā te, āvuso, diṭṭhi, paṭinissajjetaṃ pāpikaṃ diṭṭhin’ti. So evaṃ vadeti—  ‘natthi me, āvuso, pāpikā diṭṭhi, yamahaṃ paṭinissajjeyyan’ti. Taṃ saṃgho pāpikāya diṭṭhiyā appaṭinissagge ukkhipati—  adhammakammaṃ.

Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattin’ti. So evaṃ vadeti—  ‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyyan’ti. Taṃ saṃgho adassane vā appaṭikamme vā ukkhipati—  adhammakammaṃ.

Idha pana, bhikkhave, bhikkhussa na hoti āpatti daṭṭhabbā, na hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattiṃ? Pāpikā te diṭṭhi, paṭinissajjetaṃ pāpikaṃ diṭṭhin’ti. So evaṃ vadeti—  ‘natthi me, āvuso, āpatti, yamahaṃ passeyyaṃ; natthi me, āvuso, pāpikā diṭṭhi, yamahaṃ paṭinissajjeyyan’ti. Taṃ saṃgho adassane vā appaṭinissagge vā ukkhipati—  adhammakammaṃ.

Idha pana, bhikkhave, bhikkhussa na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhin’ti. So evaṃ vadeti—  ‘natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyyan’ti. Taṃ saṃgho appaṭikamme vā appaṭinissagge vā ukkhipati—  adhammakammaṃ.

Idha pana, bhikkhave, bhikkhussa na hoti āpatti daṭṭhabbā, na hoti āpatti paṭikātabbā, na hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhin’ti. So evaṃ vadeti—  ‘natthi me, āvuso, āpatti, yamahaṃ passeyyaṃ. Natthi me, āvuso, āpatti, yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyyan’ti. Taṃ saṃgho adassane vā appaṭikamme vā appaṭinissagge vā ukkhipati—  adhammakammaṃ.

Idha pana, bhikkhave, bhikkhussa hoti āpatti daṭṭhabbā. Tamenaṃ codeti. Saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattin’ti? So evaṃ vadeti—  ‘āmāvuso, passāmī’ti. Taṃ saṃgho āpattiyā adassane ukkhipati—  adhammakammaṃ.

Idha pana, bhikkhave, bhikkhussa hoti āpatti paṭikātabbā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, paṭikarohi taṃ āpattin’ti. So evaṃ vadeti—  ‘āmāvuso, paṭikarissāmī’ti. Taṃ saṃgho āpattiyā appaṭikamme ukkhipati—  adhammakammaṃ.

Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘pāpikā te, āvuso, diṭṭhi; paṭinissajjetaṃ pāpikaṃ diṭṭhin’ti. So evaṃ vadeti—  ‘āmāvuso, paṭinissajjissāmī’ti. Taṃ saṃgho pāpikāya diṭṭhiyā appaṭinissagge ukkhipati—  adhammakammaṃ.

Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe…  hoti āpatti daṭṭhabbā, hoti pāpikā diṭṭhi paṭinissajjetā…pe…  hoti āpatti paṭikātabbā, hoti pāpikā diṭṭhi paṭinissajjetā…pe…  hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ; pāpikā te diṭṭhi, paṭinissajjetaṃ pāpikaṃ diṭṭhin’ti. So evaṃ vadeti—  ‘āmāvuso, passāmi, āma paṭikarissāmi, āma paṭinissajjissāmī’ti. Taṃ saṃgho adassane vā appaṭikamme vā appaṭinissagge vā ukkhipati—  adhammakammaṃ.

Idha pana, bhikkhave, bhikkhussa hoti āpatti daṭṭhabbā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattin’ti? So evaṃ vadeti—  ‘natthi me, āvuso, āpatti, yamahaṃ passeyyan’ti. Taṃ saṃgho āpattiyā adassane ukkhipati—  dhammakammaṃ.

Idha pana, bhikkhave, bhikkhussa hoti āpatti paṭikātabbā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, paṭikarohi taṃ āpattin’ti. So evaṃ vadeti—  ‘natthi me, āvuso, āpatti, yamahaṃ paṭikareyyan’ti. Taṃ saṃgho āpattiyā appaṭikamme ukkhipati—  dhammakammaṃ.

Idha pana, bhikkhave, bhikkhussa hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘pāpikā te, āvuso, diṭṭhi, paṭinissajjetaṃ pāpikaṃ diṭṭhin’ti. So evaṃ vadeti—  ‘natthi me, āvuso, pāpikā diṭṭhi, yamahaṃ paṭinissajjeyyan’ti. Taṃ saṃgho pāpikāya diṭṭhiyā appaṭinissagge ukkhipati—  dhammakammaṃ.

Idha pana, bhikkhave, bhikkhussa hoti āpatti daṭṭhabbā, hoti āpatti paṭikātabbā…pe…  hoti āpatti daṭṭhabbā, hoti pāpikā diṭṭhi paṭinissajjetā…pe…  hoti āpatti paṭikātabbā, hoti pāpikā diṭṭhi paṭinissajjetā…pe…  hoti āpatti daṭṭhabbā, hoti āpatti paṭikātabbā, hoti pāpikā diṭṭhi paṭinissajjetā. Tamenaṃ codeti saṃgho vā sambahulā vā ekapuggalo vā—  ‘āpattiṃ tvaṃ, āvuso, āpanno, passasetaṃ āpattiṃ? Paṭikarohi taṃ āpattiṃ. Pāpikā te diṭṭhi, paṭinissajjetaṃ pāpikaṃ diṭṭhin’ti. So evaṃ vadeti—  ‘natthi me, āvuso, āpatti, yamahaṃ passeyyaṃ. Natthi me, āvuso, āpatti yamahaṃ paṭikareyyaṃ. Natthi me, āvuso, pāpikā diṭṭhi, yamahaṃ paṭinissajjeyyan’ti. Taṃ saṃgho adassane vā appaṭikamme vā appaṭinissagge vā ukkhipati—  dhammakamman”ti.