4.24 Vatthuṭhapanādi

Idha pana, bhikkhave, bhikkhu tadahu pavāraṇāya saṃghamajjhe udāhareyya—  ‘suṇātu me, bhante, saṃgho. Idaṃ vatthu paññāyati, na puggalo. Yadi saṃghassa pattakallaṃ, vatthuṃ ṭhapetvā saṃgho pavāreyyā’ti. So evamassa vacanīyo—  ‘bhagavatā kho, āvuso, visuddhānaṃ pavāraṇā paññattā. Sace vatthu paññāyati, na puggalo, idāneva naṃ vadehī’ti.

Idha pana, bhikkhave, bhikkhu tadahu pavāraṇāya saṃghamajjhe udāhareyya—  ‘suṇātu me, bhante, saṃgho. Ayaṃ puggalo paññāyati, na vatthu. Yadi saṃghassa pattakallaṃ, puggalaṃ ṭhapetvā saṃgho pavāreyyā’ti. So evamassa vacanīyo—  ‘bhagavatā kho, āvuso, samaggānaṃ pavāraṇā paññattā. Sace puggalo paññāyati, na vatthu, idāneva naṃ vadehī’ti.

Idha pana, bhikkhave, bhikkhu tadahu pavāraṇāya saṃghamajjhe udāhareyya—  ‘suṇātu me, bhante, saṃgho. Idaṃ vatthu ca puggalo ca paññāyati. Yadi saṃghassa pattakallaṃ, vatthuñca puggalañca ṭhapetvā saṃgho pavāreyyā’ti. So evamassa vacanīyo—  ‘bhagavatā kho, āvuso, visuddhānañca samaggānañca pavāraṇā paññattā. Sace vatthu ca puggalo ca paññāyati, idāneva naṃ vadehī’ti.

Pubbe ce, bhikkhave, pavāraṇāya vatthu paññāyati, pacchā puggalo, kallaṃ vacanāya. Pubbe ce, bhikkhave, pavāraṇāya puggalo paññāyati, pacchā vatthu, kallaṃ vacanāya. Pubbe ce, bhikkhave, pavāraṇāya vatthu ca puggalo ca paññāyati, tañce katāya pavāraṇāya ukkoṭeti, ukkoṭanakaṃ pācittiyan”ti.