Vippayutta

Sahetuko dhammo ahetukassa dhammassa vippayuttapaccayena paccayo—  sahajātaṃ, pacchājātaṃ. Sahajātā—  sahetukā khandhā cittasamuṭṭhānānaṃ rūpānaṃ vippayuttapaccayena paccayo; paṭisandhikkhaṇe sahetukā khandhā kaṭattārūpānaṃ vippayuttapaccayena paccayo. Pacchājātā—  sahetukā khandhā purejātassa imassa kāyassa vippayuttapaccayena paccayo.

Ahetuko dhammo ahetukassa dhammassa vippayuttapaccayena paccayo—  sahajātaṃ, purejātaṃ, pacchājātaṃ. Sahajātā—  ahetukā khandhā cittasamuṭṭhānānaṃ rūpānaṃ vippayuttapaccayena paccayo; paṭisandhikkhaṇe ahetukā khandhā kaṭattārūpānaṃ vippayuttapaccayena paccayo; khandhā vatthussa vippayuttapaccayena paccayo; vatthu khandhānaṃ vippayuttapaccayena paccayo. Purejātaṃ—  cakkhāyatanaṃ cakkhuviññāṇassa…pe…  kāyāyatanaṃ kāyaviññāṇassa…  vatthu ahetukānaṃ khandhānaṃ mohassa ca vippayuttapaccayena paccayo. Pacchājātā—  ahetukā khandhā ca moho ca purejātassa imassa kāyassa vippayuttapaccayena paccayo.

Ahetuko dhammo sahetukassa dhammassa vippayuttapaccayena paccayo—  sahajātaṃ, purejātaṃ. Sahajātaṃ—  paṭisandhikkhaṇe vatthu sahetukānaṃ khandhānaṃ vippayuttapaccayena paccayo. Purejātaṃ—  vatthu sahetukānaṃ khandhānaṃ vippayuttapaccayena paccayo.

Ahetuko dhammo sahetukassa ca ahetukassa ca dhammassa vippayuttapaccayena paccayo. Purejātaṃ—  vatthu vicikicchāsahagatānaṃ uddhaccasahagatānaṃ khandhānaṃ mohassa ca vippayuttapaccayena paccayo.

Sahetuko ca ahetuko ca dhammā ahetukassa dhammassa vippayuttapaccayena paccayo—  sahajātaṃ, pacchājātaṃ. Sahajātā—  vicikicchāsahagatā uddhaccasahagatā khandhā ca moho ca cittasamuṭṭhānānaṃ rūpānaṃ vippayuttapaccayena paccayo. Pacchājātā—  vicikicchāsahagatā uddhaccasahagatā khandhā ca moho ca purejātassa imassa kāyassa vippayuttapaccayena paccayo.