3.11 Adhammikakatikā

Tena kho pana samayena sāvatthiyā saṃghena evarūpā katikā katā hoti—

“antarāvassaṃ na pabbājetabban”ti. Visākhāya migāramātuyā nattā bhikkhū upasaṅkamitvā pabbajjaṃ yāci. Bhikkhū evamāhaṃsu—

“saṃghena kho, āvuso, evarūpā katikā katā ‘antarāvassaṃ na pabbājetabban’ti. Āgamehi, āvuso, yāva bhikkhū vassaṃ vasanti. Vassaṃvuṭṭhā pabbājessantī”ti. Atha kho te bhikkhū vassaṃvuṭṭhā visākhāya migāramātuyā nattāraṃ etadavocuṃ—

“ehi dāni, āvuso, pabbajāhī”ti. So evamāha—

“sacāhaṃ, bhante, pabbajito assaṃ, abhirameyyāmahaṃ. Na dānāhaṃ, bhante, pabbajissāmī”ti. Visākhā migāramātā ujjhāyati khiyyati vipāceti—

“kathañhi nāma ayyā evarūpaṃ katikaṃ karissanti—  ‘na antarāvassaṃ pabbājetabban’ti. Kaṃ kālaṃ dhammo na caritabbo”ti?

Assosuṃ kho bhikkhū visākhāya migāramātuyā ujjhāyantiyā khiyyantiyā vipācentiyā. Atha kho te bhikkhū bhagavato etamatthaṃ ārocesuṃ. “Na, bhikkhave, evarūpā katikā kātabbā—  ‘na antarāvassaṃ pabbājetabban’ti. Yo kareyya, āpatti dukkaṭassā”ti.