3.5.8 Kammaphalaatthibhāvapañha

Rājā āha—

“bhante nāgasena, iminā nāmarūpena kammaṃ kataṃ kusalaṃ vā akusalaṃ vā, kuhiṃ tāni kammāni tiṭṭhantī”ti?

“Anubandheyyuṃ kho, mahārāja, tāni kammāni chāyāva anapāyinī”ti.

“Sakkā pana, bhante, tāni kammāni dassetuṃ ‘idha vā idha vā tāni kammāni tiṭṭhantī’”ti?

“Na sakkā, mahārāja, tāni kammāni dassetuṃ ‘idha vā idha vā tāni kammāni tiṭṭhantī’”ti.

“Opammaṃ karohī”ti.

“Taṃ kiṃ maññasi, mahārāja, yānimāni rukkhāni anibbattaphalāni, sakkā tesaṃ phalāni dassetuṃ ‘idha vā idha vā tāni phalāni tiṭṭhantī’”ti.

“Na hi, bhante”ti.

“Evameva kho, mahārāja, abbocchinnāya santatiyā na sakkā tāni kammāni dassetuṃ ‘idha vā idha vā tāni kammāni tiṭṭhantī’”ti.

“Kallosi, bhante nāgasenā”ti.

Kammaphalaatthibhāvapañho aṭṭhamo.