2.23 Ummattakasammuti

Atha kho bhagavā bhikkhū āmantesi—

“sannipatatha, bhikkhave, atthi saṃghassa karaṇīyan”ti. Evaṃ vutte, aññataro bhikkhu bhagavantaṃ etadavoca—

“atthi, bhante, gaggo nāma bhikkhu ummattako, so anāgato”ti.

“Dveme, bhikkhave, ummattakā—  atthi, bhikkhave, bhikkhu ummattako saratipi uposathaṃ napi sarati, saratipi saṃghakammaṃ napi sarati, atthi neva sarati; āgacchatipi uposathaṃ napi āgacchati, āgacchatipi saṃghakammaṃ napi āgacchati, atthi neva āgacchati. Tatra, bhikkhave, yvāyaṃ ummattako saratipi uposathaṃ napi sarati, saratipi saṃghakammaṃ napi sarati, āgacchatipi uposathaṃ napi āgacchati, āgacchatipi saṃghakammaṃ napi āgacchati, anujānāmi, bhikkhave, evarūpassa ummattakassa ummattakasammutiṃ dātuṃ. Evañca pana, bhikkhave, dātabbā. Byattena bhikkhunā paṭibalena saṃgho ñāpetabbo—

‘Suṇātu me, bhante, saṃgho. Gaggo bhikkhu ummattako—  saratipi uposathaṃ napi sarati, saratipi saṃghakammaṃ napi sarati, āgacchatipi uposathaṃ napi āgacchati, āgacchatipi saṃghakammaṃ napi āgacchati. Yadi saṃghassa pattakallaṃ, saṃgho gaggassa bhikkhuno ummattakassa ummattakasammutiṃ dadeyya. Sareyya vā gaggo bhikkhu uposathaṃ na vā sareyya, sareyya vā saṃghakammaṃ na vā sareyya, āgaccheyya vā uposathaṃ na vā āgaccheyya, āgaccheyya vā saṃghakammaṃ na vā āgaccheyya, saṃgho saha vā gaggena vinā vā gaggena uposathaṃ kareyya, saṃghakammaṃ kareyya. Esā ñatti.

Suṇātu me, bhante, saṃgho. Gaggo bhikkhu ummattako—  saratipi uposathaṃ napi sarati, saratipi saṃghakammaṃ napi sarati, āgacchatipi uposathaṃ napi āgacchati, āgacchatipi saṃghakammaṃ napi āgacchati. Saṃgho gaggassa bhikkhuno ummattakassa ummattakasammutiṃ deti. Sareyya vā gaggo bhikkhu uposathaṃ na vā sareyya, sareyya vā saṃghakammaṃ na vā sareyyaṃ, āgaccheyya vā uposathaṃ na vā āgaccheyya, āgaccheyya vā saṃghakammaṃ na vā āgaccheyya, saṃgho saha vā gaggena, vinā vā gaggena uposathaṃ karissati, saṃghakammaṃ karissati. Yassāyasmato khamati gaggassa bhikkhuno ummattakassa ummattakasammutiyā dānaṃ—  sareyya vā gaggo bhikkhu uposathaṃ na vā sareyya, sareyya vā saṃghakammaṃ na vā sareyya, āgaccheyya vā uposathaṃ na vā āgaccheyya, āgaccheyya vā saṃghakammaṃ na vā āgaccheyya, saṃgho saha vā gaggena, vinā vā gaggena uposathaṃ karissati, saṃghakammaṃ karissati, so tuṇhassa; yassa nakkhamati, so bhāseyya.

Dinnā saṃghena gaggassa bhikkhuno ummattakassa ummattakasammuti. Sareyya vā gaggo bhikkhu uposathaṃ na vā sareyya, sareyya vā saṃghakammaṃ na vā sareyya, āgaccheyya vā uposathaṃ na vā āgaccheyya, āgaccheyya vā saṃghakammaṃ na vā āgaccheyya, saṃgho saha vā gaggena vinā vā gaggena uposathaṃ karissati, saṃghakammaṃ karissati. Khamati saṃghassa, tasmā tuṇhī, evametaṃ dhārayāmī’”ti.