3.9 Vajādīsuvassūpagamana

Tena kho pana samayena aññataro bhikkhu vaje vassaṃ upagantukāmo hoti. Bhagavato etamatthaṃ ārocesuṃ. “Anujānāmi, bhikkhave, vaje vassaṃ upagantun”ti. Vajo vuṭṭhāsi. Bhagavato etamatthaṃ ārocesuṃ. “Anujānāmi, bhikkhave, yena vajo tena gantun”ti.

Tena kho pana samayena aññataro bhikkhu upakaṭṭhāya vassūpanāyikāya satthena gantukāmo hoti. Bhagavato etamatthaṃ ārocesuṃ. “Anujānāmi, bhikkhave, satthe vassaṃ upagantun”ti.

Tena kho pana samayena aññataro bhikkhu upakaṭṭhāya vassūpanāyikāya nāvāya gantukāmo hoti. Bhagavato etamatthaṃ ārocesuṃ. “Anujānāmi, bhikkhave, nāvāya vassaṃ upagantun”ti.