17.11 Saṃghabhedakavagga

“Katihi nu kho, bhante, aṅgehi samannāgato saṃghabhedako āpāyiko nerayiko kappaṭṭho atekiccho”ti?

“Pañcahupāli, aṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, vinidhāya diṭṭhiṃ kammena—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho.

Aparehipi, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, vinidhāya diṭṭhiṃ uddesena—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho.

Aparehipi, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, vinidhāya diṭṭhi voharanto—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho.

Aparehipi, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, vinidhāya diṭṭhiṃ anussāvanena—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho.

Aparehipi, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, vinidhāya diṭṭhiṃ salākaggāhena—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho.

Aparehipi, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, vinidhāya khantiṃ kammena…pe…  vinidhāya khantiṃ uddesena…pe…  vinidhāya khantiṃ voharanto…pe…  vinidhāya khantiṃ anussāvanena…pe…  vinidhāya khantiṃ salākaggāhena—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho.

Aparehipi, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti avinayaṃ vinayoti dīpeti, vinayaṃ avinayoti dīpeti, vinidhāya ruciṃ kammena…pe…  vinidhāya ruciṃ uddesena…pe…  vinidhāya ruciṃ voharanto…pe…  vinidhāya ruciṃ anussāvanena…pe…  vinidhāya ruciṃ salākaggāhena—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho.

Aparehipi, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho. Katamehi pañcahi? Idhupāli, bhikkhu adhammaṃ dhammoti dīpeti, dhammaṃ adhammoti dīpeti, avinayaṃ vinayoti dīpeti, vinayaṃ avinayoti dīpeti, vinidhāya saññaṃ kammena…pe…  vinidhāya saññaṃ uddesena…pe…  vinidhāya saññaṃ voharanto…pe…  vinidhāya saññaṃ anussāvanena…pe…  vinidhāya saññaṃ salākaggāhena—  imehi kho, upāli, pañcahaṅgehi samannāgato saṃghabhedako āpāyiko nerayiko kappaṭṭho atekiccho”ti.

Saṃghabhedakavaggo niṭṭhito ekādasamo.

Tassuddānaṃ

Vinidhāya diṭṭhiṃ kammena,
uddese voharena ca;
Anussāvane salākena,
pañcete diṭṭhinissitā;
Khantiṃ ruciñca saññañca,
tayo te pañcadhā nayāti.