13.2 Codakādipaṭipatti

Codakena kathaṃ paṭipajjitabbaṃ? Cuditakena kathaṃ paṭipajjitabbaṃ? Saṃghena kathaṃ paṭipajjitabbaṃ? Anuvijjakena kathaṃ paṭipajjitabbaṃ? Codakena kathaṃ paṭipajjitabbanti? Codakena pañcasu dhammesu patiṭṭhāya paro codetabbo. Kālena vakkhāmi no akālena, bhūtena vakkhāmi no abhūtena, saṇhena vakkhāmi no pharusena, atthasaṃhitena vakkhāmi no anatthasaṃhitena, mettācitto vakkhāmi no dosantaroti—  codakena evaṃ paṭipajjitabbaṃ. Cuditakena kathaṃ paṭipajjitabbanti? Cuditakena dvīsu dhammesu paṭipajjitabbaṃ. Sacce ca akuppe ca—  cuditakena evaṃ paṭipajjitabbaṃ. Saṃghena kathaṃ paṭipajjitabbanti? Saṃghena otiṇṇānotiṇṇaṃ jānitabbaṃ. Saṃghena evaṃ paṭipajjitabbaṃ. Anuvijjakena kathaṃ paṭipajjitabbanti? Anuvijjakena yena dhammena yena vinayena yena satthusāsanena taṃ adhikaraṇaṃ vūpasammati tathā taṃ adhikaraṇaṃ vūpasametabbaṃ. Anuvijjakena evaṃ paṭipajjitabbaṃ.

Uposatho kimatthāya,
Pavāraṇā kissa kāraṇā;
Parivāso kimatthāya,
Mūlāyapaṭikassanā kissa kāraṇā;
Mānattaṃ kimatthāya,
Abbhānaṃ kissa kāraṇā.

Uposatho sāmaggatthāya,
Visuddhatthāya pavāraṇā;
Parivāso mānattatthāya,
Mūlāyapaṭikassanā niggahatthāya;
Mānattaṃ abbhānatthāya,
Visuddhatthāya abbhānaṃ.

Chandā dosā bhayā mohā,
there ca paribhāsati;
Kāyassa bhedā duppañño,
khato upahatindriyo;
Nirayaṃ gacchati dummedho,
na ca sikkhāya gāravo.

Na ca āmisaṃ nissāya,
na ca nissāya puggalaṃ;
Ubho ete vivajjetvā,
yathādhammo tathā kare.