4.4 Paṭiññātakaraṇa

Tena kho pana samayena chabbaggiyā bhikkhū appaṭiññāya bhikkhūnaṃ kammāni karonti—  tajjanīyampi, niyassampi, pabbājanīyampi, paṭisāraṇīyampi, ukkhepanīyampi. Ye te bhikkhū appicchā…pe…  te ujjhāyanti khiyyanti vipācenti—

“kathañhi nāma chabbaggiyā bhikkhū appaṭiññāya bhikkhūnaṃ kammāni karissanti—  tajjanīyampi, niyassampi, pabbājanīyampi, paṭisāraṇīyampi, ukkhepanīyampī”ti. Atha kho te bhikkhū bhagavato etamatthaṃ ārocesuṃ…pe…  “saccaṃ kira, bhikkhave…pe…  “saccaṃ, bhagavā”ti…pe…  vigarahitvā…pe…  dhammiṃ kathaṃ katvā bhikkhū āmantesi—

“na, bhikkhave, appaṭiññāya bhikkhūnaṃ kammaṃ kātabbaṃ—  tajjanīyaṃ vā, niyassaṃ vā, pabbājanīyaṃ vā, paṭisāraṇīyaṃ vā, ukkhepanīyaṃ vā. Yo kareyya, āpatti dukkaṭassa.

Evaṃ kho, bhikkhave, adhammikaṃ hoti paṭiññātakaraṇaṃ, evaṃ dhammikaṃ. Kathañca, bhikkhave, adhammikaṃ hoti paṭiññātakaraṇaṃ?

Bhikkhu pārājikaṃ ajjhāpanno hoti. Tamenaṃ codeti saṃgho vā, sambahulā vā, ekapuggalo vā—  ‘pārājikaṃ āyasmā ajjhāpanno’ti? So evaṃ vadeti—  ‘na kho ahaṃ, āvuso, pārājikaṃ ajjhāpanno, saṃghādisesaṃ ajjhāpanno’ti. Taṃ saṃgho saṃghādisesena kāreti. Adhammikaṃ paṭiññātakaraṇaṃ.

Bhikkhu pārājikaṃ ajjhāpanno hoti. Tamenaṃ codeti saṃgho vā, sambahulā vā, ekapuggalo vā—  ‘pārājikaṃ āyasmā ajjhāpanno’ti? So evaṃ vadeti—  ‘na kho ahaṃ, āvuso, pārājikaṃ ajjhāpanno, thullaccayaṃ…pe…  pācittiyaṃ…pe…  pāṭidesanīyaṃ…pe…  dukkaṭaṃ…pe…  dubbhāsitaṃ ajjhāpanno’ti. Taṃ saṃgho dubbhāsitena kāreti. Adhammikaṃ paṭiññātakaraṇaṃ.

Bhikkhu saṃghādisesaṃ…pe…  thullaccayaṃ…pe…  pācittiyaṃ…pe…  pāṭidesanīyaṃ…pe…  dukkaṭaṃ…pe…  dubbhāsitaṃ ajjhāpanno hoti. Tamenaṃ codeti saṃgho vā, sambahulā vā, ekapuggalo vā—  ‘dubbhāsitaṃ āyasmā ajjhāpanno’ti? So evaṃ vadeti—  ‘na kho ahaṃ, āvuso, dubbhāsitaṃ ajjhāpanno, pārājikaṃ ajjhāpanno’ti. Taṃ saṃgho pārājikena kāreti. Adhammikaṃ paṭiññātakaraṇaṃ.

Bhikkhu dubbhāsitaṃ ajjhāpanno hoti. Tamenaṃ codeti saṃgho vā, sambahulā vā, ekapuggalo vā—  ‘dubbhāsitaṃ āyasmā ajjhāpanno’ti? So evaṃ vadeti—  ‘na kho ahaṃ, āvuso, dubbhāsitaṃ ajjhāpanno, saṃghādisesaṃ…pe…  thullaccayaṃ…pe…  pācittiyaṃ…pe…  pāṭidesanīyaṃ…pe…  dukkaṭaṃ ajjhāpanno’ti. Taṃ saṃgho dukkaṭena kāreti. Adhammikaṃ paṭiññātakaraṇaṃ. Evaṃ kho, bhikkhave, adhammikaṃ hoti paṭiññātakaraṇaṃ.

Kathañca, bhikkhave, dhammikaṃ hoti paṭiññātakaraṇaṃ? Bhikkhu pārājikaṃ ajjhāpanno hoti. Tamenaṃ codeti saṃgho vā, sambahulā vā, ekapuggalo vā—  ‘pārājikaṃ āyasmā ajjhāpanno’ti? So evaṃ vadeti—  ‘āma, āvuso, pārājikaṃ ajjhāpanno’ti. Taṃ saṃgho pārājikena kāreti. Dhammikaṃ paṭiññātakaraṇaṃ.

Bhikkhu saṃghādisesaṃ…pe…  thullaccayaṃ…pe…  pācittiyaṃ…pe…  pāṭidesanīyaṃ…pe…  dukkaṭaṃ…pe…  dubbhāsitaṃ ajjhāpanno hoti. Tamenaṃ codeti saṃgho vā, sambahulā vā, ekapuggalo vā—  ‘dubbhāsitaṃ āyasmā ajjhāpanno’ti? So evaṃ vadeti—  ‘āma, āvuso, dubbhāsitaṃ ajjhāpanno’ti. Taṃ saṃgho dubbhāsitena kāreti. Dhammikaṃ paṭiññātakaraṇaṃ. Evaṃ kho, bhikkhave, dhammikaṃ hoti paṭiññātakaraṇan”ti.