9.6 Dvenissāraṇādikathā

Dvemā, bhikkhave, nissāraṇā. Atthi, bhikkhave, puggalo appatto nissāraṇaṃ. Tañce saṃgho nissāreti, ekacco sunissārito, ekacco dunnissārito. Katamo ca, bhikkhave, puggalo appatto nissāraṇaṃ, tañce saṃgho nissāreti—  dunnissārito? Idha pana, bhikkhave, bhikkhu suddho hoti anāpattiko. Tañce saṃgho nissāreti—  dunnissārito. Ayaṃ vuccati, bhikkhave, puggalo appatto nissāraṇaṃ, tañce saṃgho nissāreti—  dunnissārito.

Katamo ca, bhikkhave, puggalo appatto nissāraṇaṃ, tañce saṃgho nissāreti—  sunissārito? Idha pana, bhikkhave, bhikkhu bālo hoti abyatto āpattibahulo anapadāno, gihisaṃsaṭṭho viharati ananulomikehi gihisaṃsaggehi, tañce saṃgho nissāreti—  sunissārito. Ayaṃ vuccati, bhikkhave, puggalo appatto nissāraṇaṃ, tañce saṃgho nissāreti—  sunissārito.

Dvemā, bhikkhave, osāraṇā. Atthi, bhikkhave, puggalo appatto osāraṇaṃ tañce saṃgho osāreti, ekacco sosārito, ekacco dosārito. Katamo ca, bhikkhave, puggalo appatto osāraṇaṃ, tañce saṃgho osāreti—  dosārito? Paṇḍako, bhikkhave, appatto osāraṇaṃ, tañce saṃgho osāreti—  dosārito. Theyyasaṃvāsako, bhikkhave, appatto osāraṇaṃ, tañce saṃgho osāreti—  dosārito. Titthiyapakkantako, bhikkhave…pe…  tiracchānagato, bhikkhave…  mātughātako, bhikkhave…  pitughātako, bhikkhave…  arahantaghātako, bhikkhave…  bhikkhunidūsako, bhikkhave…  saṃghabhedako, bhikkhave…  lohituppādako, bhikkhave…  ubhatobyañjanako, bhikkhave, appatto, osāraṇaṃ, tañce saṃgho osāreti—  dosārito. Ayaṃ vuccati, bhikkhave, puggalo appatto osāraṇaṃ, tañce saṃgho osāreti—  dosārito. Ime vuccanti, bhikkhave, puggalā appattā osāraṇaṃ, te ce saṃgho osāreti—  dosāritā.

Katamo ca, bhikkhave, puggalo appatto osāraṇaṃ, tañce saṃgho osāreti—  sosārito? Hatthacchinno, bhikkhave, appatto osāraṇaṃ, tañce saṃgho osāreti, sosārito. Pādacchinno, bhikkhave…pe…  hatthapādacchinno, bhikkhave…  kaṇṇacchinno, bhikkhave…  nāsacchinno, bhikkhave…  kaṇṇanāsacchinno, bhikkhave…  aṅgulicchinno, bhikkhave…  aḷacchinno, bhikkhave…  kaṇḍaracchinno, bhikkhave…  phaṇahatthako, bhikkhave…  khujjo, bhikkhave…  vāmano, bhikkhave…  galagaṇḍī, bhikkhave…  lakkhaṇāhato, bhikkhave…  kasāhato, bhikkhave…  likhitako, bhikkhave…  sīpadiko, bhikkhave…  pāparogī, bhikkhave…  parisadūsako, bhikkhave…  kāṇo, bhikkhave…  kuṇī, bhikkhave…  khañjo, bhikkhave…  pakkhahato, bhikkhave…  chinniriyāpatho, bhikkhave…  jarādubbalo, bhikkhave…  andho, bhikkhave…  mūgo, bhikkhave…  badhiro, bhikkhave…  andhamūgo, bhikkhave…  andhabadhiro, bhikkhave…  mūgabadhiro, bhikkhave…  andhamūgabadhiro, bhikkhave, appatto osāraṇaṃ, tañce saṃgho osāreti—  sosārito. Ayaṃ vuccati, bhikkhave, puggalo appatto osāraṇaṃ, tañce saṃgho osāreti—  sosārito. Ime vuccanti, bhikkhave, puggalā appattā osāraṇaṃ, te ce saṃgho osāreti—  sosāritā.

Vāsabhagāmabhāṇavāro niṭṭhito paṭhamo.