9.32 Pabbājanīyakammapaṭippassaddhikathā

Idha pana, bhikkhave, bhikkhu saṃghena pabbājanīyakammakato sammā vattati, lomaṃ pāteti, netthāraṃ vattati, pabbājanīyassa kammassa paṭippassaddhiṃ yācati. Tatra ce bhikkhūnaṃ evaṃ hoti—  ‘ayaṃ kho, āvuso, bhikkhu saṃghena pabbājanīyakammakato sammā vattati, lomaṃ pāteti, netthāraṃ vattati, pabbājanīyassa kammassa paṭippassaddhiṃ yācati. Handassa mayaṃ pabbājanīyakammaṃ paṭippassambhemā’ti. Te tassa pabbājanīyakammaṃ paṭippassambhenti—  adhammena vaggā…pe…  adhammena samaggā…  dhammena vaggā…  dhammapatirūpakena vaggā…  dhammapatirūpakena samaggā. Tatraṭṭho saṃgho vivadati—  ‘adhammena vaggakammaṃ, adhammena samaggakammaṃ, dhammena vaggakammaṃ, dhammapatirūpakena vaggakammaṃ, dhammapatirūpakena samaggakammaṃ, akataṃ kammaṃ dukkaṭaṃ kammaṃ puna kātabbaṃ kamman’ti. Tatra, bhikkhave, ye te bhikkhū evamāhaṃsu—  ‘dhammapatirūpakena samaggakamman’ti, ye ca te bhikkhū evamāhaṃsu—  ‘akataṃ kammaṃ dukkaṭaṃ kammaṃ puna kātabbaṃ kamman’ti, ime tattha bhikkhū dhammavādino. Imepi pañca vārā saṃkhittā.