3.8 Saṃghabhedeanāpattivassacchedavāra

Idha pana, bhikkhave, vassūpagato bhikkhu passati sambahule bhikkhū saṃghabhedāya parakkamante. Tatra ce bhikkhuno evaṃ hoti—  ‘garuko kho saṃghabhedo vutto bhagavatā; mā mayi sammukhībhūte saṃgho bhijjī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘asukasmiṃ kira āvāse sambahulā bhikkhū saṃghabhedāya parakkamantī’ti. Tatra ce bhikkhuno evaṃ hoti—  ‘garuko kho saṃghabhedo vutto bhagavatā; mā mayi sammukhībhūte saṃgho bhijjī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘asukasmiṃ kira āvāse sambahulā bhikkhū saṃghabhedāya parakkamantī’ti. Tatra ce bhikkhuno evaṃ hoti—  ‘te kho me bhikkhū mittā. Tyāhaṃ vakkhāmi “garuko kho, āvuso, saṃghabhedo vutto bhagavatā; māyasmantānaṃ saṃghabhedo ruccitthā”ti. Karissanti me vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘asukasmiṃ kira āvāse sambahulā bhikkhū saṃghabhedāya parakkamantī’ti. Tatra ce bhikkhuno evaṃ hoti—  ‘te kho me bhikkhū na mittā; api ca ye tesaṃ mittā, te me mittā. Tyāhaṃ vakkhāmi. Te vuttā te vakkhanti “garuko kho, āvuso, saṃghabhedo vutto bhagavatā; māyasmantānaṃ saṃghabhedo ruccitthā”ti. Karissanti tesaṃ vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘asukasmiṃ kira āvāse sambahulehi bhikkhūhi saṃgho bhinno’ti. Tatra ce bhikkhuno evaṃ hoti—  ‘te kho me bhikkhū mittā. Tyāhaṃ vakkhāmi “garuko kho, āvuso, saṃghabhedo vutto bhagavatā; māyasmantānaṃ saṃghabhedo ruccitthā”ti. Karissanti me vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘asukasmiṃ kira āvāse sambahulehi bhikkhūhi saṃgho bhinno’ti. Tatra ce bhikkhuno evaṃ hoti—  ‘te kho me bhikkhū na mittā; api ca ye tesaṃ mittā te me mittā. Tyāhaṃ vakkhāmi. Te vuttā te vakkhanti “garuko kho, āvuso, saṃghabhedo vutto bhagavatā; māyasmantānaṃ saṃghabhedo ruccitthā”ti. Karissanti tesaṃ vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘amukasmiṃ kira āvāse sambahulā bhikkhuniyo saṃghabhedāya parakkamantī’ti. Tatra ce bhikkhuno evaṃ hoti—  ‘tā kho me bhikkhuniyo mittā. Tāhaṃ vakkhāmi “garuko kho, bhaginiyo, saṃghabhedo vutto bhagavatā; mā bhaginīnaṃ saṃghabhedo ruccitthā”ti. Karissanti me vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘amukasmiṃ kira āvāse sambahulā bhikkhuniyo saṃghabhedāya parakkamantī’ti. Tatra ce bhikkhuno evaṃ hoti—  ‘tā kho me bhikkhuniyo na mittā. Api ca yā tāsaṃ mittā, tā me mittā. Tāhaṃ vakkhāmi. Tā vuttā tā vakkhanti “garuko kho, bhaginiyo, saṃghabhedo vutto bhagavatā. Mā bhaginīnaṃ saṃghabhedo ruccitthā”ti. Karissanti tāsaṃ vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘amukasmiṃ kira āvāse sambahulāhi bhikkhunīhi saṃgho bhinno’ti. Tatra ce bhikkhuno evaṃ hoti—  ‘tā kho me bhikkhuniyo mittā. Tāhaṃ vakkhāmi “garuko kho, bhaginiyo, saṃghabhedo vutto bhagavatā. Mā bhaginīnaṃ saṃghabhedo ruccitthā”ti. Karissanti me vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassa.

Idha pana, bhikkhave, vassūpagato bhikkhu suṇāti—  ‘amukasmiṃ kira āvāse sambahulāhi bhikkhunīhi saṃgho bhinno’ti. Tatra ce bhikkhuno evaṃ hoti—  ‘tā kho me bhikkhuniyo na mittā. Api ca yā tāsaṃ mittā tā me mittā. Tāhaṃ vakkhāmi. Tā vuttā tā vakkhanti “garuko kho, bhaginiyo, saṃghabhedo vutto bhagavatā; mā bhaginīnaṃ saṃghabhedo ruccitthā”ti. Karissanti tāsaṃ vacanaṃ, sussūsissanti, sotaṃ odahissantī’ti, pakkamitabbaṃ. Anāpatti vassacchedassā”ti.